الرمزين C5 و C4

 اليوم سالفتنة تخص هذني الرمزين...الرمزين C5 و C4

وهاي السالفة صارت من سمعت الاخ صلاح جليو سأل المهندس البناني عن رمز c4 وهاي السالفة صارت بمؤتمر گري

سألة گالة عندي سبلت گري شديتة وطلع بي هذا الرمز شنو معناتة...

طبعا الاخ المهندس من شركة هاندلاند

كان كلش مؤدب وخلوق وبشوش الوجه ومتمكن فنيا....

لكن ربما فاتة الاطلاع على هذا الرمز او التبس واشتبه عليه الامر..

فكان جوابه... بأن هذا الرمز موجود في منظومات الvrf

والمنظومات التي فيها كارت خارجي فقط وحصرا...

طبعا هنا اني ادخلت فگتلة حبيبي هذا الرمز موجود ويطلع بالاجهزه كلها من جبيرها لزغيرها...

جاوبني گالي لا يجوز انت مشتبه ربما تقصد رمز c5وليس c4

لان الc5 معناه ان هنالك مشكلة في الجمبر...

فگتلة يا عيوني لا اقصد الرمز c4 وبالتحديد هو ولا تناقشني بذني الرموز لان حافظ كل برغي ورمز وكل قطعة بالاجهزة الي تطلع من معمل گري وتوسوت واعرفهن اكثر من اطفالي...

گالي مستحيل اكو هيج.. گتلة جيبلي هسة سبلت گري طنين شغال واطلعلك الرمز هسة بس من اخلص اخذ السبلت الي...

اخذ فرة ورجعلي گالي متأكد من هذا الرمز؟

گتلة يمعود مو گتلك اعرفهن واحد واحد وحتى اذا السبلت الضاغط يوجعة او عندة التهاب بالاكسبانشن او گحة بالراديتر اعرفة...

گتلة انتبهلي زين

رمز c5 يطلع بالاجهزة الي تشتغل على غاز 22 اذا الجمبر متحرك او مفقود

گال صحيح هذا الكلام

گتلة ورمز c4 يطلع بالاجهزة الي تشتغل على غار 410‪  لنفس السبب اذا الجمبر متحرك او مفقود...

هنا هو دولغ شوية وطلع الايفون وضل يدور مدري يتراسل مدري ويامن....

ورة شوية اجاني وباسني وگالي كلامك صح مية بالمية

وتصافحنة وتبواسنة

رباط سالفتنة

اريد اگلكم ذني الرمزين حفظوهن

وينطبقن على كل جهاز يطلع من مجموعة توسوت گري

كرافت وستون وكل خواتهن

اذا طلع عندك واحد من ذني الرمزين اركض كبل وعدل للجمبر

وسلامتكم

ملحق بمنشور الرموز C5 و C4

بكل بساطة.. وحتى اقرب الفكرة

ومسولف بيها منشور سابق

ولان اغلب الاخوة سألوني بالتعليقات او بالرسائل على الخاص يسألون شنو (الجمبر) وشنو فائدتة؟

راح اسولف سالفة الجمبر بس اعذروني لان منشور واحد يكفي

فراح اسولف نص هسة والنص الثاني بعدين اذا ما نسيتة او غلست عليه.. لذلك ذكروني حتى اسولفة...

هسة نبلش على هذا الفدشي اليسمونة (الچمبر) وهذا الفد شي يجي عبارة عن قطعة بلاستك وبيها خمس اقطاب... وذني الاقطاب الخمسة بيهن ثلاث اقطاب موصلات مع بعض واثنين فارغات وبموديل ثاني بالعكس..

ويجي هذا الجمبر بثلاثة اللوان

(احمر و سمائي و ازرق)

وكل لون يجي بموديل شكل

وما يرهمن واحد على الثاني الا اتسوولكم دحفوسة وهاي الدحفوسة بعدين اسولفلكم عليها..

المهم...

فانت من عندك سبلت كارتة محترگ وتريد تبدلة كارت

هنا ركزززززز وياي كلش فرد نوب

تجيب الكارت القديم تخليه بصف الكارت الجديد وتباوع بنظرة ثاقبة (مثل ما تباوع على ذيج السالفة)

وتشوف الجمبر اذا لونة احمر كون قاعدة الجمبر الي بالكارت واذا ازرق واذا سمائي كون يتشابه لونهن... واذا لگيت الوانهن يختلف فهذا الجمبر ما يرهم على هذا الكارت...

لهنا اظن وصلت الفكرة

زين اذا الجمبر ما يرهم بهاي الحالة شراح تسوي؟

سؤال يطرح نفسة ويدغمث بالتراب!!!!

أني أگلك شسوي گدامك تلث طرق

- لو تجيب كارت نفس الكارت العاطل عندك كون نفس لون قاعدة الجمبر يعني اخوه التوم مو اخوه بالرضاعة يعني كوبي بيست.

- لو اكو طريقة ثانية تگدر تستغني بيها عن الجمبر (وهاي اسولفها بعدين)

- واسهل وابسط طريقة هي تقشمرالكارت وبلوفة زغيرة ترهم الجمبر المختلف لونة على الكارت(وهاي هم اسولفها بعدين)

ملاحظة هذا الحجي الفوك كلة يخص الاجهزة الطالعة من معمل توست وكري واخوتهن......

الجمبر الي اقصده

هذا الفد شي المأشرين عليه

واليعرف هذا اصبع منو الة هدية كيلو كليجة لان صاحب الاصبع مغرم بالكليجة

وسلامتكم

تعديل المقال