مشاكل المضخات الطلمبات troubleshooting

لو شغلت الطلمبه ومافيش سريان خارج او مافيش ضغط خارج

لو الطلمبه شغاله والضغط او معدل السريان اقل من المعتاد

لو الطلمبه بتفصل لما اشغلها

لو الطلمبه صوتها عالى اول لما شغلتها

-----------------------------

نحاول نعمل شويه خطوات لغايت لما نلاقى المشكله اتحلت زى ماهنشوف (الشرح هيكون مختصر فلو فى استفسار نشرح بتفاصيل اكتر ان امكن ان شاء الله):

1. لو فى اى بلف مقفول على خط سحب او طرد الطلمبه يتم فتحه .. هيكون سهل لو البلف بيبان عليه من شكله اذا كان مفتوح ولا مقفول ولكن الصعب لو فى بلف شكله مفتوح وهو فى الحقيقه مقفول فساعتها هتحاول تلف على بلف بلف علشان تعرف مين اللى قافل وهنا البلف ده محتاج يتغير او يتصلح.

2. طبيعى جدا لو الماتور مش شغال فالطلمبه مش هتشتغل بس الاول نعرف هل مشكله ان الماتور مش شغال ان مافيش كهرباء وصلاله ولا هو مش راضى يشتغل كنوع من انواع الحمايه لان عامود الماتور او عامود الطلمبه مش راضى يدور (stuck) فهنا هنحتاج كشف على امكانيه دوران عامود الطلمبه او الماتور يدويا قبل التشغيل .. والمشكله دى ممكن تحصل لو الطلمبه/الماتور كانت فى صيانه واتربط على اجزاءها الميكانيكيه بشده ادت ان عامود الطلمبه/الماتور مش عارف يتحرك.

3. لو عامود الطلمبه مش شغال يعنى عامود الماتور مش متوصل بعامود الطلمبه وده اما ان الكوبلن مش موصل العامودين ببعض (نتيجه اعمال صيانه سابقه) او ان الكوبلن اتكسر وفصل الحركه بين عامود الماتور والطلمبه.

4. لو الطلمبه مش متحضره priming (فى حاله ان الطلمبه لازم تتحضر للتشغيل) وتحضير الطلمبه معناه ان الطلمبه وخط السحب يكونو مليانين بالسائل لان الغاز او الهواء لو موجود بيمنع السائل انه يدخل الطلمبه.

5. لو طلمبه جديده وشاريها علشان تسحب من حوض او تسحب من القاع والمسافه بينها وبين السائل كبيره فهى مش عارفه تسحب سائل .. يعنى انا بشغل الطلمبه فى ظروف غير مناسبه ليها.

6. لو الطلمبه فى قدامها ضغط عالى وهى مش عارفه تقاوم الضغط ده فمثلا لو عايز طلمبه ترفع ضغط 5 بار وضغط السحب 1 يعنى ضغط الطرد 1 + 5 يبقى 6 بار فلو لقيت ان الضغط على طرد الطلمبه 8 بار فكده الطلمبه مش هينفع انها تدفع سائل.

7. لو المصفاه stainer الموجوده على سحب الطلمبه مسدوده وده نعرفه عن طريق فرض ضغط حول المصفاه او لو بلوف خط السحب مفتوحه ومافيش سائل بيدخل الطلمبه.

8. لو طلمبه بتسحب من حوض او من القاع فبيكون فى بدايه خط السحب بلف عدم رجوع foot valve علشان المياه فى خط السحب ماتنزلش للحوض فالبلف ده ممكن يكون مقفول مش راضى يفتح وبالتالى مش هيدخل سائل على الطلمبه.

9. لو طلمبه بتسحب من حوض او من القاع وخط السحب مش غرقان فى السائل لان فى الحاله دى الطلمبه هتسحب هواء فلازم نهايه خط السح تكون تحت منسوب السائل بصورة دائمه.

10. لو خط سحب الطلمبه مش متربط كويس فهيدخل هواء من التربيطات دى لخط سحب الطلمبه ويتجمع داخل الطلمبه air leak from flanges وممكن كمان نفس الموضوع ده يحصل فى الفلنشات اللى جسم الطلمبه او بين جسم الطلمبه وخطوط السحب.

11. لو ال shaft seal بايظ ففى بداية التشغيل بيدخل هواء للطلمبه والجزء ده وظيفته انه يمنع تهريب السائل من داخل الطلمبه لخارجها والجزء ده فى منه شكلين mechanical seal and (packing) stuffing box

12. لو ضغط السائل عند سحب الطلمبه اقل من الضغط البخارى vapor pressure فده يسبب تبخر السائل وتكون غاز داخل الطلمبه وفى خط السحب ودى ظاهره التكهف cavitation.

13. لو السائل اللى بسحبه دايب جواه غاز او هواء فبرده يسبب تكون غاز او هواء داخل الطلمبه.

14. لو الطلمبه بيحصل فيها تهريب من الطرد للسحب وده بيحصل فى حاله فشل الحلقه الحاكمه بين خط السحب والطلمبه wearing ring.

15. لو الريش الخاصه بالمروحه اتسدد نتيجه مواد صلبه زى فحم او املاح فده هيخلى الطلمبه مش عارفه تضغط السائل.

16. لو البلف اللى موجود فى بدايه الطلمبه foot valve اللى بتسحب من القاع اصغر من اللازم فمش هيخلى الطلمبه تسحب كويس وده كأنك قافل على خط السحب.

17. لو المروحه اللى جوه الطلمبه اتكسرت جزئيا او كليا وده غالبا بيتعرف نتيجه الصوت العالى اللى هيحصل لما تشغل الطلمبه.

18. لو الماتور بيلف عكسى لان كل طلمبه ليها سرعه محدده بيتم ضبط ال 3 phase بتاعت الكهرباء على الماتور على ان الماتور يدور بنفس اتجاه الدوران المتصمم عليه الطلمبه.

19. لو فى طلمبه تانيه شغاله بالتوازى مع الطلمبه اللى انت عايز تشغلها والطلمبه التانيه دى عامله ضغط back pressure قدام الطلمبه اللى انت عايز تشغلها.

20. لو سرعه الطلمبه قليله (اقل من المسموح) فالطلمبه مش هتدفع سائل وده بيحصل فى حاله ان الماتور بيتم تغيير سرعته فى حاله التشغيل لان اغلب المواتير للطلمبات سرعاتها ثابته.

21. لو لزوجه السائل اعلى من اللزوجه اللى متصمم عليها الطلمبه فالطلمبه مش هتشتغل بالشكل الطبيعى ليها و مش هتدينا الضغط اللى محتاجينه.

22. لو عامود الطلمبه حصلله تآكل عند المروحه لغايت لما اتفصل عن المروحه خالص يعنى العامود بيدور والمروحه داخل الطلمبه مش بتدور .. مشكله كبيره شويه لان الطلمبه دى كده بقالها زمن مادخلتش صيانه او ان السائل مش مناسب مع معدن الطلمبه.

23. لو الحشو packing - stuffing box مش مناسب مع ظروف التشغيل زى حراره السائل ونوعه فممكن يضرب اول لما الطلمبه تشتغل ويهرب السائل من داخل الطلمبه لخارجها.

24. لازم نحاول ان مركز دوران عامود الطلمبه يكون نفس مركز دوران عامود الماتور alignment فلو العامودين مش على نفس المركز فساعتها الطلمبه مش متدور بشكل طبيعى وممكن دى يسبب لارتفاع حراره الماتور ويفصل overload

25. ال sealing بالنوعين بتوعه بيحتاج تزييت فلو الزيت اللى داخل عليهم فيه مواد صلبه او الزيت مش مناسب فال sealing هيضرب و هيهرب السائل من داخل الطلمبه لخارجها وممكن التزييت بيكون من السائل اللى داخل الطلمبه ولكنه بيحتاج تبريد مياه فلو المياه دى فيها املاح او مواد صلبه فبرده هتخلى ال seal يضرب.

26. لو الخلوص clearance اللى بين عامود الطلمبه وبين جسم الطلمبه اكبر من المسموح فساعتها السائل اللى داخل الطلمبه هيهرب للخارج والمشكله دى بتحصل لو الطلمبه متجمعه او متصنعه فى ورشه مش بالنظام القياسى standard.

27. لو كراسى عامود الطلمبه/الماتور bearing (رولمان البلى) متركب غلط فاول لما الطلمبه تشتغل فالكراسى دى بتبوظ واما العمود stuck فالماتور هيفصل overload او هيحصل اهتزازات عاليه بالطلمبه وبرده الماتور هيفصل overload.

28. الكراسى اللى اتكلمنا عليها من شويه بتكون فى صندوق فيه زيت bearing house فلو نوع الزيت مش مناسب او الزيت فيه شوائب او ان الزيت فيه شويه مياه ودى هتتبخر مع حراره الكراسى او ان الصندوق مافيهوش زيت خالص فهيحصل نفس اللى ممكن يحصل فى النقطه اللى فاتت رقم 27.

29. برده الكراسى اللى اتكلمنا عليها ممكن بدل ماتتزيت بالزيت فتتزيت بالشحم فبرده لو الشحم فيه مواد صلبه او مش مناسب او الشحم اكتر من اللازم فهيحصل نفس المشاكل اللى فى رقم 27

30. لو سرعه الماتور ازيد من اللازم فساعتها اما الطلمبه مش هتعرف تشتغل كويس وتدفع السائل بصوره جيده او هيحصل تكهف cavitation او ان الماتور هيفصل overload

31. لو فى مشكله فى ال overload بتاع الماتور وبيخلى الماتور يفصل من غير اى مشكله فلو عملتله override فالماتور يشتغل كويس.

32. لو الطلمبه بتسحب سائل درجه حرارته اعلى من المسموح او بتسحب من ارتفاع اقل من المسموح او بتسحب كثافه اقل من المسموح فده هيصبب التكهف cavitation زيه زى اللى السائل لما يتبخر نتيجه ان ضغطه عند الطلمبه اقل من ضغطه البخارى.

تعديل المقال