عملية قياس ضغط الغاز في اجهزة الانفيرتر...

عملية معقدة نوعا ما...

وبيها حساب وكتاب .

حتى تحصل نتائج دقيقة لهذا القياس .. المفروض يعمل الجهاز حسب المواصفات الي تصمم عليها..

يعني يكون الجهاز يعمل بضروف مطابقة لحسابات المصمم. حتى تكون القيم دقيقة .

جهاز القياس المعتمد هو ( الگيج ) سواء كان ميكانيكي او الكتروني ماكو فرق.. .

تنفتح ولف الخدمة وتربط الگيج

( نفس عملية قياس ضغط هواء التايرات )

لكل جهاز ضغط غاز معين... واهم شي لا تنسى انه اكو درجات سماح .. محددة من قبل الشركة الصانعة .

وهذا الضغط يكون خاضع لضروف معينة

وبدرجة حرارة .. وعدد دورات ضاغط . وكلها الها حسابات خاصة من قبل المصنع....

يعني جدول طويل عريض خلي كلمة ((عريض)) بين قوسين .. لزوجة وحرارة وعدد دورات .. ونسب بينهم بعمليات حسابية .

من هالرطينة الفوگ .. اريد اگلك .. اذا واحد صار ابو العريف وقاس ضغط الغاز بدون الاعتماد على الحسابات المتعارفة والعلمية .. فهذا سلملي عليه.

وهسه نجي للمفيد ..

اكو حساسين او جوزتين

وحدة اسمها ( لو برشر ) يعني حساس ضغط الغاز المنخفض .

واختها اسمها (هاي برشر) يعني حساس ضغط الغاز المرتفع...

وحدة تشتغل عكس الثانية..

ذني الجوزات مصممات حتى ( يحسن ) بالقيمة المثالية والسماحات لضغط الغاز .. حتى ما يشتغل عندك كود خطأ (أرر) .

اما اذا قل الضغط عن قيمة السماح .. بهالحالة يأشر عندك كود انخفاض او ارتفاع ضغط الغاز ..

واذا اشتغل الأرر

يعني .. دخل الجهاز بحالة الخطر .. لهذا يجب ان تطفي وتشوف شنو الخلل . وتستدعي مختص يحدد المشكلة وين وشنو.

وللموضوع بقية .. لان صارت طويلة .

ملاحظة ..

الجدول الي بالصورة المرفقة ..يفيدكم هواي خلوه جوه ايديكم

.

تعديل المقال