الكارته الالكترونيه 

الفكره بشكل عام نقدر نستنتجها من التايمر بس بشكل احسن التايمر بيتحكم بشكل ميكانيكي يعني تروس بتوصل بعدد لفات فوقت معين فتغير من وضع لوضع ده شكل ميكانيكي بحت تعالي بقي للشكل الالكتروني ونحاول مع بعض النهارده نوصل للفكره الاساسيه

كل الكارتات الالكترونيه تحتوي علي عقل صناعي صغير جدا اسموا متحكم او كنترولر المتحكم ده اداه الكترونيه تقدر تبرمجها زي مانت عاوز وتسجل عليها اوامر معينه عن طريق برنامج انت اللي بتدهولها

زي مثلا انك توصل لمبات وتعمل برنامج تحدد فيه وقت اضائة اللمبات عن طريق زمن

كمان المتحكم ده تقدر تربطوا بادوات تاني يعني هناخد نفس فكرة اللمبات ونقدر نوصل معاه حساس ضوء مثلا ونقولوا لما ضوء الشمس يختفي نور اللمبات دي لان بمجرد اختفاء الضوء حساس الضوء هيدي اشاره للمتحكم والاشاره دي بتكون نبضه كهربيه مثلا فيوصل المعالج اللمبات ولما يظهر ضوء الشمس او النهار توصل اشاره معكوسه للمبرمج اللي يدي امر باطفاء اللمبات

طيب كده وصلنا لفكرة المتحكم ده تعالي نتعمق اكتر

المتحكم ده بيشتغل علي تيار مستمر مثلا وبيوزع ادوار علي ادوات فجهاز زي التلاجه مثلا لكن المعروف ان التيار عندنا مستمر وبالتالي اي بوره هتلاقيها بتبدا بحاجه اسمها قنطرة توحيد يعني ايه بقي يعني دي بتكون مسؤوله عن تحويل التيار المتردد بتاعنا لتيار مستمر ودي هنتكلم عنها بالتفصيل فمنشور منفصل بعد كده بيتحول التيار ده لمستمر لكن بيكون تيار مشوش فبيتم تنقيته عن طريق مكثف اسموا مكثف تنعيم وده بيكون ديما بعد قنطرة التوحيد واحيانا بيكونوا اتنين بعد المرحله دي هتلاقي احيانا موجود ملف كهربي طيب تعالي بقي نقول حاجه المتحكم ده بيشتغل بفولت مستمر فولت صغير جدا طيب ازاي الفولت الصغير ده يقدر يشغل ضاغط مثلا بيشتغل ب220 هنا بقي بييجي دور جزء مهم جدا فاي كارته وهو الريلاي الالكتروني وده وظيفتوا انوا يفتح ويقفل نقط توصيل ولكن هو بيشتغل بفولت صغير جدا ولكن يقدر يوصل جزء بيشتغل بجهد عالي وبردوا هنشرحوا بالتفصيل فمنشور لوحدوا يبقي كده الريلاي ده عباره عن مفتاح كهربي بيشتغل بفولت بسيط جدا مستمر لكن يمرر التيار لجزء كبير بيشتغل بفولت متردد عادي جدا زي الضاغط المروحه السخاان مثلا طيب يبقي انا فهمت كده ان المتحكم يقول مين يشتغل ومين يقف والريلاي يمرر التيار للجزء ده طيب المتحكم ده يقول لده اشتغل ايمتي ويقول لده اقف ايمتي وهل هو بيحس ولا بيعتمد علي وقت طيب هل ليه ايدين وعنين ولا بيعرف ازاي

ده موضوع المنشور الجاي ان شاء الله

والمنشور اللي بعدوا بقي هناخد كل جزء فالكارته لوحدوا نتكلم عنوا وازاي اقدر اقيسوا

واعرف انوا فيه مشكله ازاي

زي الدايودات والمقاومات المكثفات الفوتوكابلر الريلاي الملف الفيوز والحمايه الحراريه

كلوا بالتوالي

قد يعجبك ايضا

تعديل المقال