880297244420632
random

اصلاح كيتشن ماشين براون 600، 650، 700، 750،

الخط

اصلاح كيتشن ماشين براون 600، 650، 700، 750،


شرح بسيط اوي لأسماء وأرقام المكونات الإلكترونية وبدائلها وطريقة قياسها بالنسبة لهواة الإلكترونيات، لكن بالنسبة للناس اللي مش بيحبوا الالكترونيات يهمهم أسماء القطع وشراءها وتركيبها واصلاح العطل،
المكونات معتادة العطل نبدأ بيها:
أولا: أربع دايودات توحيد، يوجد منهم اتنين في البوردة الصغيرة، صورة رقم واحد، واتنين في البوردة الكبيرة، صورة رقم اتنين، ودي اول مرة اشوف بريدچ توحيد متوزع التوزيعة المنيلة دي😀، المهم أرقام الدايودات ديRGP15J ودا دايود مش عادي، داfast switching يعني لو ركبت بداله دايود توحيد عادي هيضرب في ساعتها، دايودات600 فولت 1.5 أمبير،250 نانو ثانية، لو سألت بنفس الإسم مش هتلاقيه، طيب البديل ايه؟ البديل دايوداتin4937 برضوfast و600 فولت بس واحد امبير فقط، طيب نعمل ايه في الموضوع دا، هنربط اتنين توازي مع بعض زي الصورة رقم تلاتة، يعني الدايود الواحد هنعوض عنه باتنين توازي عشان يتحمل التيار، طبعا انت مش هتلاقي الدايودات كلها ضاربة، ممكن تلاقي اتنين بس، لكن يستحسن تغير الاربعة مرة واحدة، طريقة القياس هتلاقيهم عاملين شورت، قافلة يعني، هيدوك صفارة بالأڤو، هتنزل تشتري البديل من مول النخيلي في باب اللوق، هتلاقي الواحد ب75 قرش.
ثانيا: مقاومة فيوزية حرارية زي الصورة رقم اربعة بتضرب لما دايودات التوحيد تضرب، المقاومة قيمتها 47. اوم يعني حوالي نص اوم، لكن خمسة واط، هتشتري زيها وتركبها زي الصورة رقم خمسة، هتلاقيها بسهولة جدا عند الجمال في باب اللوق الواحدة بجنيه أو جنيه ونص.
ثالثا: البرنس الكبير وسبب كل البلاوي واغلى قطعة في البوردة كلها، ترانزيستورigbt رقمهG7N60C الصورة رقم ستة, قد يبدو للوهلة الاولى الموسفت المشهورة7N60 لكن لو ركبت الموسفت بداله هتضرب في ثانية زي ماحصل معايا😅، المهم اتضح في الاخر انه ترانزيستورigbt, طيب هتنزل تلف عليه باب اللوق وضواحيها مش هتلاقيه برضو، نشتري بداله ايه؟ هنشتري الترانزيستور رقمirg4pc50w ودا البديل الوحيد المتاح اللي ينفع بداله لإن الباقي مختلف في الخواص، طبعا الجديد اكبر ومختلف في الشكل زي الصورة رقم تسعة، لكن ما باليد حيلة، وعموما مصلحة لإن الجديد بيتحمل لحد55 امبير، القديم بيتحمل14 بس، طيب هنركبه ازاي، هنلزقه على الهيت سينك اللي كان ملحوم عليها الأصلي، بس هنلزقه من الجمب زي الصورة رقم عشرة، انا حاطط معجون حراري بينه وبين المبرّد ومثبته بإيبوكسي من فوق والجوانب، ونعمل توصيلة بسلكين من البوردة للرجول بتاعته، نفس ترتيب رجول الاصلي، اليمين والشمال نوصلهم بمكان لحام يمين وشمال الاصلي في البوردة، والرجل اللي في النص نلحمها في الهيت سينك نفسه. الترانزيستور متاح في باب اللوق وسعره من30 ل50 حسب المحل. 
رابعا: مقاومة صغيرة سطحيةsmd قيمتها470 اوم ربع واط، الصورة رقم ستة، هتلاقيها واصلة بالرجل الشمال بتاعة الترانزيستور، وبتتحرق معاه لما يتحرق، هنلاقيها بسهولة في باب اللوق بربع جنيه، حتى ممكن نركب بدالها مقاومة عادية مش لازم سطحية.
خامسا: خمس مقاومات سطحيةsmd قيمتهم واحد أوم نص واط، الصورة رقم سبعة، بيتحرقوا كلهم مع بعض لما الترانزيستور يتحرق، مش هتلاقي النوع دا في باب اللوق لإنه نوع خاص شوية قدرته عالية، هتضطر تركب بدالهم مقاومات عادية امو رجول، واحد اوم نص واط، وتلحمهم بشياكة كدا زي الصورة رقم تمانية منغير ماتدخل الدنيا على بعضيها😀. هتشتري الخمسة بجنيه من الجمال أو النخيلي.
سادسا، الصورة رقم حداشر، اتنين دايودsmd زي بعض مكتوب عليهمuj ودا الماركينج كود، لكن هوا رقمهUS1J ودا دايودultrafast سريع جدا يعني ميركبش بدالهم دايودات عادية، 600 فولت، واحد أمبير، 75 نانو ثانية، هتسأل عليهم مش هتلاقيهم، هتشتري البديلMUR160 بحوالي جنيه. احتمال تلفهم صغير. 
سابعا: في الصورة رقم حداشر برضو، هتلاقي القطعة الكبيرة اللي شبه الترانزيستور مكتوب عليهاRUR460 ودا دايودUltrafast سريع جدا، يعني برضو ميركبش بداله دايود عادي، 600 فولت، اربعة أمبير، 60 نانو ثانية، لو سألت عليه بنفس الرقم مش هتلاقيه، هتشتري البديلffpf04s60s أو لو ملقتش دا اربط اربعة مع بعض توازي من الدايودات السابق ذكرهاMUR160. وإلحم الموجب بمكان الرجل اليمين والسالب بمكان الرجل الشمال.
ثامنا: الصورة رقم اتناشر، الايسي الرئيسي والوحيد، رقمهLM393 والحمد لله انه متاح جدا ومشهور ورخيص باربعة جنيه في النخيلي، ودا خليه اخر حاجة تغيرها لو البوردة مشتغلتش بعد تغيير كل حاجة. احتمال تلفه صغير. 
تاسعا: الصورة رقم13 اتنين ترانزيستورPNP زي بعض مكتوب عليهم3K ودا الماركينج كود، لكن هما رقمهمBC858 أوBC856 وموجودين جدا في باب اللوق، الواحد بجنيه عند الجمال. نادر التلف. 
عاشرا: الصورة رقم13 التانية، ترانزيستورNPN مكتوب عليه1Ks ودا الماركينج كود، لكن هوا رقمهBC848B وموجود برضو بسهولة الواحد بجنيه. نادر التلف. 
الصورة رقم14 اتنين دايودsmall signal fast switching بخط اسود، مش مكتوب عليهم حاجة لكن رقمهمin4148 الواحد بربع جنيه عند الجمال، والتالت ابو خط اصفر دا زينر دايودvoltage regulator diode خمستاشر فولت ورقمهBZX79-C15 بنص جنيه من رام. نادر التلف. 
الصورة رقم15 مكثف التنعيم الرئيسي 47 ميكروفاراد 350 فولت، باربعة جنية عند رام، نادر التلف.
الصورة رقم16 مقاومة6 أوم، اربعة واط، ومقاومة220 اوم، تلاتة واط، موجودين بسهولة في الجمال الواحدة بجنية. نادر يتحرقوا. 
الصورة رقم17 مقاومة 68 كيلو اوم، اتنين واط، نص جنيه. ومقاومة 220 كيلو أوم، نص واط، بربع جنيه.
الصورة رقم18 في البوردة الصغيرة، مقاومة430 أوم،خمسة واط، بجنيه ونص،نادر تتحرق.
باقي المكونات السطحية نادر جدا تتحرق وعلى أسوأ التقدير لو اتحرقت، موجودة ومتاحة جدا منغير بدائل ورخيصة جدا جدا. 
طبعا انت ممكن من كل دا تلاقي قطعة واحدة أو قطعتين أو تلاتة محروقين، مش بالضرورة تلاقيهم كلهم محروقين يعني😀،
طريقة قياس الدايودات بالأڤو على وضع الصفارة، من الاخر الدايود اللي يصفر معاك يبقا محروق، قياس الترانزيستورات برضو على وضع الصفارة، هتلاقيهم بيصفروا لو بايظين، قياس المقاومات الفيوزية على وضع الصفارة المفروض تديك صفارة لو سليمة، لو محروقة مش هتديك صفارة، المقاومات التانية على وضع الأوم. طب انت معندكش اڤو ولا بتعرف تستخدمه، غيّر المكونات دائمة التلف وخلاص هيا اصلا رخيصة😀،الموضوع بسيط محتاج منك كاوية لحام وحتة قصدير والقليل فقط من المهارة في اللحام.
قبل ماتوصل الموتور بالبوردة، جرب الأول منغير موتور وقيس الجهد مكان توصيل الموتور، المفروض تلاقي 320 فولت مستمر



























ليست هناك تعليقات
إرسال تعليق

إرسال تعليق

نموذج الاتصال
الاسمبريد إلكترونيرسالة