معلومة على الماشي


معلومة على الماشي




حبة ثغرات وقعت انا وغيري من الفنيين فيها و اتعلمنا منها ونتمني انها تعلم غيرنا واللي عنده ثغرة يتفضل يقولها :: ..
** لو قابلك لوك اطرافه مقطعة وعايز تحدد أطرافه ظبط بنسة الامبير على الفولت وشغل الغسالة و والطرفين اللي يدوك 220 تحط فردة منهم في رقم واحد باللوك او رقم ٣ باللوك او n باللوك حسب ترقيم او حروف اللوك اللي معاك والفردة التانية مع اي فردة تانية من فرد اللوك وحط فردة اللوك الثالثة في الترملة الثالثة ولو شغلت ولاقيت الجهاز اشتغل بدون قفل الباب هاتبدل الفردتين 2 و 3 او تبدل الفردتين 4 و 5 او تبدل الفردتين L و C وهاتلاقي الجهاز اشتغل بمجرد غلق الباب عادي ..
** وانت بتغير جوان الباب لو نضفت مكانه كويس وحطييت صابون سائل في مجرة الجوان النتاية اللي بتشبك في شفة الحلة الدكر وحطيت لحسة صابون على الشفة دي هتلاقي الجوان بيركب بالضغط عليه وبسهولة جدا . لكن نصيحة ابقي نضف ايدك انت من بواقي الصابون .
** في غسالة الأطباق خليك حافظ حاجة أن فتح درج المسحوق مرتبط بتشغيل السخان يعني علامتك أن الغسالة دخلت تسخين أو لا هو فتح درج المسحوق ولو الغسالة معملتش تسخين تقيس السخان او الميكروسوتش اللي بيسمح دخول الهيتر من عدمه .
** اي غسالة حديثة قفلت اللوك بتاعها ومنطقتش اول حاجة تشوفها هو فلتر الطلمبة واتأكد انها شغالة ومفيش حاجة معرقلة دوران ريشة الطلمبة ولو لاقيتها شغالة ولاقيت المية في الحلة اكشف على خرطوم بطن الحلة علشان اغلب الموديلات لو مطردتش المية المركونة الاول عمرها ما هاتسحب مية جديدة.
** لو لعبت في أطراف ميزان اي غسالة قديمة صور الأطراف بالموبايل علشان لو اتلغبطت ممكن تعمل قفلة عند العميل وهايبقى شكلها وحش .
** مفيش موتور سرعات في اي غسالة بشربون يلف اتجاه وميلفش العكس واتأكد لو ملفش اتجاه مستحيل يلف الاتجاه التاني ولو حصلت معاك فكر على طول في ريله الكارت او شياط بالتايمر ابو كارت .
** مش كل برامج الغسيل بيعتمد تحديد مستوى المياه فيها على الميزان فقط ؛ فيه نوع بيعتمد على 
ميزان او ميزان و فلوميتر او ميزان و فلوميتر وكارت او كارت وميزان 
بمعني أن الكارت يعطي الصمام وقت محدد لسحب كمية مياه لمدة دقيقتين مثلا وخصوصا في البرامج السريعة علشان كدة لو شيلت خرطوم الميزان في البرامج دي تلاقي الغسالة وقفت في السحب عند حد معين ولكن مش هاتدخل تسخين .

** أسلم طريقة لمعرفة الصمام قاطع ولا لا لو ممعكش بنسة امبير هو انك تدخل فردة كهربا واحدة من الفيشة يعني الفردة اللي بتنور مع مفك الاختبار في فردة صمام والفردة التانية تلمس بمفك الاختبار لو نور يبقى سليم ولو منورش يبقى قاطع .
** وانت بتفك مسامير الحلة الاكواتيك قبل ما تفك الطارة حط الحلة كلها على طبق بلاستيك قوي او حبة من مطبخ العميل علشان ممكن تعرض الطارة بتاعة الحلة للرفة او الاعوجاج او القطم .
** لو اشتريت صمام غسالة توب جديد وركبته ولاقيت برضوه بيفوت مية بسبب ضغط المياه الذايد عند العميل تقوم فاكك الصمام من بعضه لغاية ما توصل لسوستة الضغط وتفتحها شوية وركب تاني هتلاقي الصمام منع المية .
** حط معاك فرشة اسنان في الشنطة علشان تنضف كوليكتور الموتور وانت بتغيير الشربون من غبار الصنفرة والشربون القديم في النحاسة بتاعة الموبينة .
** خود بالك وانت بتغير المساعدين بتكون مرقمة يعني مساعد الاكواتيك مثلا عليه رقم 10 مثلا والمساعد الثاني عليه رقم 4 يبقى رقم عشرة عزمه أشد وده اللي بيركب في جه الموتور لو واخد زاوية او في نفس اتجاه دوران العصر ورقم أربعة يركب الناحية الثانية .
** مفك تست . شريط لحام . افيزان بلاستيك . شحم . ذيت . ديفكون . كولا . سيلكون حراري . بنسة امبير .. مهمين جدا في شنطة العدة
تعليقات