random

القياسات والمسافات (فوق - تحت-امام-خلف-يمين - يسار) القطعة الداخلية والخارجية للسبلت

 القياسات والمسافات (فوق - تحت-امام-خلف-يمين - يسار) القطعة الداخلية والخارجية للسبلت


طبعا اني دائما الح بهاي السالفة ولحوح جدا بيها بس كون الحاحي ما يضوجكم....
والسالفة هي سالفة القياسات والمسافات (فوق - تحت-امام-خلف-يمين - يسار) القطعة الداخلية والخارجية للسبلت.....
يا من فدوة اروحلك خوية الفني من تطلع تنصب سبلت تعب نفس شوية واصرف من وقتك دقيقة وباوع للسماحات المخليتها الشركة للمسافات... لان كلها محسوب حسابها.....
خو هم مو غشمة من خلو هاي المسافات....
ومثل ما تشوفون بالصورة الي موجودة بالسبالت المصنوعة في مصنع گري....
القطعة الداخلية عن السقف ١٥ سم. ويجي واحد ايلزگة الك بالسگف حتى مجال (لابو بريص) ما يخلي يعبر...
وبنفس الوقت محددلك عن الارض ٢٥٠ سم....وهم يجيك واحد يصعدة للثريا....
زين عن اليمين والشمال منطيك مسافة ١٥ سم... خو ما يحتاج بعد تلزگة بالحايط...
هسة نجي للقطعة الخارجية...
الي صمم الجهاز يگول لازم تترك مسافة خلف السبلت ٣٠ سم... هسة واحد يگول واذا شادينة على ستاند شلون...
راح اگلة ترة ٣٠ سم مو هواي هي مسافة مسطرة.... والستاند كافي وزايد... وهاي ال ٣٠ سم للجهاز اليتخلة بالگاع... وهنا الموضوع يختلف....
هسة نجي للشغلة المهمة كلش...
وهي المسافة امام السبلت... وشفنة يا ما شفنة من طراگيع من هاي السالفة....
خوية المنصب بعد روحي الي صمم الجهاز يگول خلي مسافة مترين امام السبلت (هذا الحجي لسبلت ٢ طن)... وهاي الحسابات من صممو الجهاز على مواصفات استندر...
واحنة بالعراق الحرارة العدنة تسمط ابو الاستندر....
فنصيحة شگد ما عندك مجال خلي المجال مفتوح گدام الفان حتى تگوم تجر سويحلي وتسلطن...
وبعدين من تشد الحارة على ستاند لا تلزگها بالسكف لان أمة عيسى من صممو الجهاز يگولون خلي مسافة كافية للصيانة يعني فد ٥٠ سم مثلا....
ولا تشتبه وتگول اهم شي الگدام السبلت مجال مفتوح وانت خانگة خنگ من الصفاح.... خلي مجال وخاصة من جهة القفالة فد ٥٠ سم...
وبعدين هاي القياسات الك احسن حتى يكون شغلك مرتب وللجهاز احسن حتى يگوم يغرد بالتبريد
والزبون يندعيلك.....
وسلامتكم


google-playkhamsatmostaqltradent